އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު ތ.ގާދިއްފުށީ އަދި ތ. ގުރައިދޫ އަށް ވަޑައިގެންފިި

އައި.ޑީ.ޕީގެ ރައީސް އަދި ރިޔާސީ ކެންޑިޑޭޓް އުމަރު ނަސީރު މެދުރާއްޖެތެރެއަށް ކުރައްވާ ކެމްޕޭންދަތުރުފުޅުގައި މިހާރު ވަޑައިގެން އުޅުއްވަނީ ތ.ގުރައިދޫގެ އާންމު ހާލަތު ބައްލަވާ އެރަށު ރައްޔިތުންނާއި ބައްދަލުކުރެއްވިއެވެ. ތ.ގުރައްދީ ރައްޔިތުންނާއި ވާހަކަފުޅު ދައްކަވަމުން ވިދާޅުވީ ދިވެހިރާއްޖޭގައި ފުރިހަމަ ލޯކަލް ޤަވާރމަންޓްގެ ނިޒާމެއް ޤާއިމްކޮށްގެން ނޫނީ ދިވެހިރާއްޖެ ތަރައްޤީ ނުކުރެވޭނެކަމަށް ފެނިވަޑައިގަންނަވާކަމަށެވެ. ﷲ އިރާދަފުޅުން އެމަނިކުފާނަށް ދިވެހިރާއްޖޭގެ ވެރިކަން ލިބިއްޖެނަމަ ލޯކަލް ގަވާރމަންޓްގެ ފުރިހަމަނިޒާމެއް ޤާއިމް ކުރައްވާނެކަމަށް ވިދާޅުވިއެވެ. އަދި ދިވެހިރާއްޖެއަށް ދިމާވެފައިވާ އެންމެ ބޮޑު މައްސަލަ، ޑްރަގްގެ ހާލަތު އަނބުރާލައްވާނެ ކަމަށާއި ރާއްޖޭގެ ހަތަރު ސަރަހައްދުގައި ހަތަރު ސިޓީ ޤާއިމް ކުރައްވާނެ ކަމަށެވެ. ގުރައިދޫ އަކީ އެއްފަސް ކުރަން ޖެހޭ ރަށެއް ނޫން ކަމަށާއި ރާއްޖޭގެ ހަތަރު ސަރަހައްދުގައި ހަތަރު ސިޓީ ޤާއިމް ކުރެއްވުމުން ގުރައިދޫ ފަދަ ރަށްރަށައް ތަރައްޤީ އިތުރުވެގެން ދާނެކަމަށް އުމަރު ނަސީރު ވިދާޅުވިއެވެ.

ތ.ގުރައިދޫގެ ރައްޔިތުންނާއި ބައްދަލުކުރައްވާ އެރަށުގެ އާންމު ހާލަތު ބެއްލެވުމަށްފަހު މިހާރު އެމަނިކުފާނު ވަޑައިގެން އުޅުއްވަނީ ތ.ގާދިއްފުށީގައެވެ. ތ.ގާދިއްފުށްޓަށް ވަޑައިގަތީ 16:25 ގައެެވެ. ތ.ގާދިއްފުށީގެ މުހިންމު ތަންތަނަށް ޒިޔާރަތް ކުރެއްވުމަށް ފަހު މިހާރު އުމަރު ނަސީރު އެރަށުގެ ރައްޔިތުންނާއި ބައްދަލުކުރައްވަމުން އެބަގެންދަވައެވެ.

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު ތ.ގުރައިދޫގައިި

އައި.ޑީ.ޕީގެ ރައީސް އަދި ރިޔާސީ ކެންޑިޑޭޓް އުމަރު ނަސީރު މެދުރާއްޖެތެރެއަށް ކުރައްވާ ކެމްޕޭންދަތުރުފުޅުގައި މިހާރު ވަޑައިގެން އުޅުއްވަނީ ތ.ގުރައިދޫގައެވެ. ތ.ގުރައިދޫ އަށް ވަޑައިގަތީ މިއަދު 14:22 ގައެވެ. ގުރައިދޫގެ މުހިންމު ތަންތަނަށް ޒިޔާރަތް ކުރެއްވުމަށް ފަހު މީހާރު އުމަރު ނަސީރު މިރަށު ހޮޅުއަށި ސަރަހައްދުގައި ރައްޔިތުންނާއި ބައްދަލުކުރައްވަމުން އެބަގެންދަވައެވެ.

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މ.ކޮޅުފުށީގެ ސުނާމީގައި ހާލުގައި ޖެހުނު ރައްޔިތުންނާއި ބައްދަލުކުރައްވައިފި

އައި.ޑީ.ޕީގެ ރައީސް އަދި ރިޔާސީ ކެންޑިޑޭޓް އުމަރު ނަސީރު މ.މުލީގެ އާންމު ހާލަތު ބައްލަވާ އެރަށުގެ ރައްޔިތުންނާއި ބައްދަލުކުރެއްވުމަށްފަހު މ.ކޮޅުފުށްޓަށް ވަޑައިގަތުމަށް މިއަދު ހެނދުނު 11:05 ގައި ދަތުރުފުޅު ފަށްޓަވައި 11:40 ގައި ކޮޅުފުށްޓަށް އުމަރު ނަސީރު ވަޑައިގެންނެވިއެވެ. އަދި މިހާރި އެމަނިކުފާނު ގެންދަވަނީ ކޮޅުފުށީގެ ސުނާމީގައި ހާލުގައި ޖެހުނު ރައްޔިތުންނާއި ބައްދަލުކުރައްވަމުންނެވެ. ޓެންޓު ތަކަށް ވެދިވަޑައިގެން އެތަންތަނުގައި އެރަށު ރައްޔިތުން އުޅެމުން ގެންދާ ދަތި ހާލަތު އެމަނިކުފާނު ބައްލަވަމުން އެބަ ގެންދަވައެވެ. އަދި ޓެންޓު ތަކުގައި ދިރިއުޅެމުންދާ މިރަށުގެ ރައްޔިތުން އެބޭފުޅުންގެ އުދާސްތައް އެމަނިކުފާނަށް ދެންނެވިއެވެ. ދުވާލު ހޫނުގަދައިރު ޓެންޓުތަކުގެ ތެރޭގައި ދިރިނޫޅެވޭތީވެ ވޭތުވިދިޔަ 4 އަހަރު ދުވަހުގެ ތެރޭގައި އެރަށުގެ ދުވާލުގެ ގަޑި ތަކުގައި ރައްޔިތުން އުޅެނީ ޓެންޓުން ބޭރުގައި ގަސްގަހުގެ ހިޔަލުގައިކަމަށް އެބޭފުޅުން ފާހަގަ ކުރެއްވިއެވެ. އައި.ޑީ.ޕީ އިން ދެކޭ ގޮތުގައި މިޓެންޓު ތަކަކީ އެއްގޮތަކަށްވެސް އިންސާނުން ދިރިއުޅެން އެކަށީގެންވާ ތަންތަނެއް ނޫނެވެ. ކޮޅުފުށީގެ ރައްޔިތުން ދެކޭ ގޮތުގައި ސަރުާރުން އެމީހުންނަށް ދޭންވާވަރާ ގާތަށްވެސް އެހީތެރިކަން ނުދެއްވާކަމަށް ރައްޔިތުން ފާހަގަ ކުރައްވައެވެ. މިހާރުމިވަނީ ދެވަނަ ސުނާމީ އެއް ކޮޅުފުށްޓަށް އަރާފައިކަމަށް އެއީ އެމީހުންގެ ހާލު އެއްދުވަހުން އަނެއް ދުވަހަށް ގޯސް ވަމުން އަންނާތީކަމުގައި މިރަށު ރައްޔިތުން ފާހަގަ ކުރެއްވިއެވެ. އަދި މީގެ އިތުރުން މިއަތޮޅުގެ އަތޮޅުވެރިން އެކަށީގެންވާ ވަރަށް މިރަށަށް ޒިޔާރަތް ނުކުރައްވާ ކަމަށްވެސް ފާހަގަކުރެއްވިއެވެ.

"އައި.ޑި.ޕީގެ ވެރިކަމެއްގައި ޑްރަގް އެތެރެކޮށް ވިއްކާ ނިޒާމް ފުނޑުފުނޑު ކޮށްލާނަން" – އުމަރު ނަސީރު

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މިހާރު މެދުރާއްޖެ ތެރެއަށް ކުރައްވަމުން ގެންދަވާ އެމަނިކުފާނުގެ ކެމްޕޭން ދަތުރުފުޅުގައި 2008 ސެޕްޓެމްބަރ 23 ވަނަ ދުވަހުގެ ރޭ 09:30 ގައި މ.މުލީ ބަނދަރުގައި ހުންނަ ސްޓޭޖް ސަރަހައްދުގައި މިރަށު ރައްޔިތުންނާއި ބައްދަލުކުރައްވައިފިއެވެ. އުމަރުގެ ވާހަކަފުޅުގައި އެމަނިކުފާނުގެ ވެރިކަމެއްގައި މަސްތުވާތަކެތި އެތެރެކޮށް ވިއްކާ ނިޒާމް ފުނޑުފުނޑު ކޮށްލާނެ ކަމަށް ވިދާޅުވިއެވެ. އަދި އެމަނިކުފާނުގެ ސިޔާސަތުތައް މިރަށުރައްޔިތުނަށް ހާމަކުރައްވާ ރައްޔިތުން ކުރެއްވި ސުވާލުތަކަށް އެމަނިކުފާނު ޖަވާބުދެއްވިއެވެ.

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މ.ނާލާފުށްޓަށާއި މ.މުލި އަށް ވަޑައިގަންނަވައިފި

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މެދުރާއްޖެތެރެއަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި މިހާރު ވަޑައިގެން އުޅުއްވަނީ މ.ނާލާފުށީގައެވެ. މ.ނާލާފުށްޓަށް ވަޑައިގެންނެވީ 17:00 ގައެވެ. މ.ނާލާފުށްޓަށް ވަޑައިގެން މިރަށުގެ މުހިންމު ތަންތަނަށް ޒިޔާރަތްކުރެއްވިއެވެ. އަދި އަތިރިމަތީ ހޮޅުއަށީގައި މިރަށުރައްޔިތުންނާއި ބައްދަލުކުރައްވާ އެމަނިކުފާނުގެ ސިޔާސަތުތައް ހާމަކުރެއްވިއެވެ. އަދި ރައްޔިތުންނާއި ދެއްކެވި ވާހަކަފުޅުގައި ވޯޓް ގަންނާނެ ފައިސާ ނެތްކަމަށާއި އެމަނިކުފާނަށް ދެވެން އޮތީ ހިތްވަރާ، އަޒުމާ، އެމަނިކުފާނުގެ ލޭފޮދު ކަމަށެވެ. މިރަށު ރައްޔިތުންނާއި ބައްދަލުކުރެއްވުމަށްފަހު ދެން ވަޑައިގެންނެވީ މ.މުލި އަށެވެ. މ.މުލިއަށް ވަޑައިގެންނެވީ 17:35 ގައެވެ.

މ.މުލިއަށް ވަޑައިގެންނެވިއިރު އެމަނިކުފާނަށް މަރުހަބާ ދެންނެވުމަށް ވަޑައިގެންތިއްބެވި ރައްޔިތުންނާއި ބައްދަލުކުރައްވާ ރަށުތެރެ ބައްލަވާލެއްވިއެވެ. މިރޭ އުމަރު ނަސީރު އާއި އެމަނިކުފާނުގެ ކެމްޕޭން ޓީމް ރޭކުރުމަށް ހަމަޖެހިފައިވަނީ މ.މުލީގައެވެ. އަދި މިރޭ 09:30 ގައި އުމަރު ނަސީރު މިރަށު ބަނދަރުމަތީ ސްޓޭޖް ސަރަހައްދުގައި ގައި މުލީގެ ރައްޔިތުންނާއި ބައްދަލުކުރައްވާނެއެވެ. އަދި ރަށުތެރޭގައި އެމަނިކުފާނަށް މަރުހަބާ ދެންނެވުމަށް ގިނަ އަދަދެއްގެ ޕޯސްޓަރު ހަރުކޮށްފައިވާ ކަމަށް އައި.ޑީ.ޕީގެ މުރާސިލް މައުލޫމާތު ދެއްވައެވެ.

އުމަރު ނަސީރުގެ ވެރިކަމެއްގައި މ.ދިއްގަރަށް ފްލެޓް

އައި.ޑީ.ޕީގެ ރިޔާސީ ކެންޑިޑޭޓް އަލްފާޟިލް އުމަރު ނަސީރުގެ ކެމްޕޭން ދަތުރުފުޅުގައި މ.ދިއްގަރަށް ވަޑައިގެން މިއަދު (2008 ސެޕްޓެމްބަރ 23 ވަނަ ދުވަހު) 15:30 ގައި އެރަށު މާރުކޭޓް ސަރަހައްދުގައި ރައްޔިތުންނާއި ބައްދަލުކުރައްވައިފިއެވެ. މިބައްދަލުކުރެއްވުމުގައި ވާހަކަފުޅު ދައްކަވަމުން އެރަށުގެ ރައްޔިތުން ކުރެއްވި ސުވާލަކަށް ޖަވާބު ދެއްވަމުން ވިދާޅުވީ މިރަށަކީ ބިން ފުރުފައިވާ ރަށަކަށްވާތީ އެމަނިކުފާނުގެ ވެރިކަމެއްގައި މިފަދަ ރަށްރަށުގައި އަޅުއްވަން ހަމަޖައްސަވާފައިވާ ފްލެޓްތަކުގެ ތެރެއިން މިރަށުގައިވެސް ފްލެޓް އަޅުއްވައިދެއްވާނެ ކަމަށެވެ.

މިރަށުގެ ރައްޔިތުން އެމަނިކުފާނު ވަޑައިގަތުމުން ދެއްވި ތަރުހީބަށް ޝުކުރު އަދާކުރެއްވިއެވެ.

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މ.ދިއްގަރުގައި

އައި.ޑީ.ޕީގެ ރިޔާސީ ކެންޑިޑޭޓް އުމަރު ނަސީރު މިހާރު މެދުރާއްޖެތެރެއަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި މިހާރު ވަޑައިގެން އުޅުއްވަނީ މ.ދިއްގަރުގައެވެ. މ.ދިއްގަރަށް ވަޑައިގެންނެވީ 14:25 ގައެވެ.